संघीय सरकारको असहयोगले सोचे अनुरुपको काम गर्न सकेनौ ः मुख्यमन्त्री राउत

भदौ १५ । मुख्यमन्त्री लालबाबु राउतले संघीय सरकारको असयोगका कारण सोचे जस्तो काम गर्न नसकेको बताउनु भएको छ । मुख्यमन्त्री ‘बेटी पढाउ, बेटी बचाउ’ कार्यक्रम अन्तर्गत साईकल वितरण गर्न सिरहा पुग्नु भएको मुख्यमन्त्री राउतले संघीय सरकारको असहयोगका कारण प्रदेशमा लक्ष्य अनुरुप काम गर्न नसकेको बताउनु भएको हो ।

साइकल वितरण कार्यक्रमलाई सम्बोधन गर्नु हुँदै उहाँले प्रदेश सरकारले विभिन्न काम तथा अभियानको थालनी गरेपनि संघीय सरकारको हस्तक्षेप र असहयोगले गर्दा कामलाई गति दिन नसकेको गुनासो गर्नु भयो । संघीय सरकारले प्रदेश २ सरकारको काम प्रभावित पार्न एकवर्षमै चार–चार वटा सचिव परिवर्तन गरेको र त्यसकारण चाहेर पनि जनताको अपेक्षा अनुरुप काम हुन नसकेको दुखेसो पोख्दै मुख्यमन्त्री राउतले केन्द्रीय सरकार संघीयता लाई नै धरापमा पार्ने खेल समेत गरि रहेको आरोप लगाउनु भयो । समृद्ध देश र प्रदेशको परिकल्पना पूरा गर्न तीनै तहको सरकारबीच सहकार्य, समन्वय र तालमेलको आवश्यकता रहेको उल्लेख गर्दै उहाँले भन्नु भयो ,‘ समृद्धिको सपना पूरा गर्न नारा लगाएर मात्र हुदैन , हृदय देखी अघि बढनु पर्दछ । ’ मुख्यमन्त्री राउतले बेटी पढाउ, बेटी बचाउ अभियान अन्तर्गत एक आर्थिक वर्षमा ४–५ हजार साईकल वितरण गर्ने लक्ष्य लिएकोमा १४ हजार साइकल वितरण भै रहेको बताउनु भयो ।

समाजिक रुपान्तरणको लागि नारी सशक्तिकरण आवश्यक रहेकाले यसलाई उच्च प्राथमिकतामा राखेर प्रदेश सरकार अघि बढेको उहाँको कथन थियो । प्रदेश २ सरकारको मुख्यमन्त्री ‘बेटी पढाउ, बेटी बचाउ’ कार्यक्रम अन्तर्गत सिरहाका विभिन्न पाँट वटा विद्यालयमा एकैदिन चारसय ६२ छात्रालाई साईकल हस्तान्तरण गरिएको छ। लहानस्थित लक्षमण ललिता माविमा १ सय ३, मिर्चैयास्थित मोहन उमाविमा १ सय १३, जनता बनवाली बर्छवामा १ सय १२, , राजमावि छजनामा ५७ र मिर्चैया नगरपालिका वडा ७ स्थित बाजुमावि फूलवरियामा ७७ वटा गरी कक्षा ८ मा अध्ययनरत ४ सय ६२ जना छात्रालाई साईकल वितरण गरिएको हो ।