मेक्सिको सिमानामा पर्खाल लगाउने ट्रम्पको योजनामा धक्का

एजेन्सी : अमेरिकी संसद्को माथिल्लो सदन सिनेटले मेक्सिकोको सिमानामा पर्खाल लगाउन रकम जोहो गर्ने उद्देश्ले राष्ट्रपति डोनाल्ड ट्रम्पले घोषणा गरेको राष्ट्रिय सङ्कटकाल उल्ट्याउने पक्षमा मतदान गरेको छ । 

उनकै पार्टीका सिनेट सदस्यले पनि उनको विपक्षमा मतदान गरे । १२ जना रिपब्लिकन सिनेट सदस्यहरूले आफ्नो पार्टीको निर्देशन विपरीत राष्ट्रपतिको आदेशको विपक्षमा मतदान गरिदिएपछि ट्रम्पको योजना प्रभावित हुने अवस्था आएको हो ।

सिनेटमा राष्ट्रिय सङ्कटकाल उल्ट्याउने पक्षमा मतदान भएपछि ट्रम्पले अब विशेष अधिकार प्रयोग गरेर भए पनि आफ्नो योजना सफल पारिछाड्ने प्रतिक्रिया दिएका छन् ।

तर ट्रम्पको यो योजना पनि सफल हुने देखिँदैन । किनभने त्यहाँको प्रतिनिधिसभामा विपक्षी डेमोक्र्याटिक पार्टीको वर्चस्व छ ।

पर्खाल परियोजनाका लागि आवश्यक पर्ने सबै रकम दिन कंग्रेस तयार नभएपछि ट्रम्पले सङ्कटकालको बाटो रोजेका थिए ।