कर्जनहामा नुहाउने क्रममा ८ वर्षीय बालक बेपत्ता

सिरहा, कर्जनाहा — सिरहाको कर्जनाहा नगरपालिका वडा नं. ११ का दिपक महराका ८ वर्षीय छोरा शिबा महरा नुहाउने क्रममा बेपत्ता भएका छन्। शिबा महरा कर्जनाहा अस्पताल नजिकैको नहरमा नुहाउँदै गर्दा अचानक बेपत्ता भएका हुन्। घटनापछि आफन्तहरूले स्थानीय प्रशासन तथा सम्बन्धित निकायहरूलाई जानकारी गराए पनि खोजी कार्यमा कुनै पनि पक्षको सक्रियता नदेखिएको भन्दै पीडित परिवारले गुनासो पोखेका छन्। बालकको खोजी कार्यमा ढिलासुस्ती भएको भन्दै उनका आफन्त तथा स्थानीयवासीहरू आक्रोशित भएका छन्। उनीहरू हाल कमला सिचाइ पूर्वी नहर प्रणालीको पोर्ताहा कार्यालयमा धर्ना तथा विरोध आन्दोलनको तयारीमा रहेको बुझिएको छ।