मिर्चैया, सिरहा | पछिल्लो समय नेपाली युवाहरूको ठूलो हिस्सा वैदेशिक रोजगारीका लागि खाडी मुलुकमा पसिना बगाइरहेका छन्। तर, सिरहाको मिर्चैया नगरपालिका–११, सितापुरका जगत नारायण यादव भने आफ्नै गाउँको माटोमा 'सुन' फलाउन व्यस्त हुनुहुन्छ। वैदेशिक रोजगारीको कठिन यात्रा र विदेशको पीडालाई अनुभवका रूपमा आत्मसात गर्दै उहाँ अहिले स्वदेशमै एक सफल र उदाहरणीय किसानका रूपमा स्थापित हुनुभएको छ।
बिहीबार बिहान सितापुरस्थित उहाँको खेतमा पुग्दा दृश्य साँच्चै प्रेरणादायी देखिन्थ्यो। यादव आफ्नो खेतमा उखुसँगै गहुँको मिश्रित खेती (Mixed Farming) स्याहार्न र गोडमेल गर्न तल्लीन हुनुहुन्थ्यो। नयाँ सोच र कडा मेहनतका साथ अघि बढ्नुभएका उहाँले कृषि कर्मबाटै मनग्य आम्दानी गरिरहनुभएको छ।
मिश्रित खेतीबाट दोब्बर फाइदा
यादवले एउटै जमिन र उही समयमा उखु र गहुँ दुवै बाली लगाएर उत्पादन बढाउने नयाँ जुक्ति निकाल्नुभएको छ। यसले लागत घटाउनुका साथै किसानको आम्दानीमा उल्लेख्य वृद्धि पुर्याएको छ। उहाँले आफ्नै खेतबाट वार्षिक करिब ८ देखि १० लाख रुपैयाँसम्म आम्दानी गर्दै आउनुभएको छ।
विदेशको दुःखले डोर्याएको स्वदेशको सफलता
केही समय वैदेशिक रोजगारीमा बिताउनुभएका यादवले त्यहाँको दुःख र अनुभवले आफूलाई आफ्नै देशमा केही गर्ने प्रेरणा दिएको बताउनुहुन्छ। "विदेशमा अर्काको इसारामा पसिना बगाउनु भन्दा आफ्नै माटोमा मेहेनत गर्दा आत्मसन्तुष्टि र राम्रो कमाइ दुवै मिल्छ," उहाँले अनुभव सुनाउनुभयो।
समयको गतिसँगै आफ्नो सोच र प्रविधि परिवर्तन गरेका कारण उहाँ अहिले कृषिमा पूर्ण रूपमा आत्मनिर्भर बन्नुभएको छ। उहाँको यो सक्रियताले "कृषि नै समृद्धिको आधार हो" भन्ने कुरालाई व्यवहारमै प्रमाणित गरिदिएको छ।
युवाहरूका लागि प्रेरणाको स्रोत
आफ्नै देशमा केही हुँदैन भन्दै विदेश पलायन हुने युवाहरूका लागि जगत नारायण यादव एउटा ज्वलन्त उदाहरण हुनुहुन्छ। उहाँको मेहेनत र सफलताले अन्य किसानहरूका लागि पनि नयाँ सम्भावनाको ढोका खोलिदिएको छ। उहाँको यो व्यावसायिक कृषि यात्राले सिङ्गो मिर्चैया क्षेत्रका युवाहरूलाई स्वदेशमै कृषिमा भविष्य खोज्न उत्साह र उर्जा थपेको स्थानीयहरू बताउँछन्।
