ब्राउन सुगरजस्तो पदार्थसहित सिरहामा नरहा ३ खोरियाका एक युवक पक्राउ

सिरहा । सिरहाको गोलबजार नगरपालिका–६ स्थित धमनिमाई मन्दिर नजिकबाट प्रहरीले ब्राउन सुगरजस्तो देखिने पदार्थसहित एक युवकलाई नियन्त्रणमा लिएको छ। प्रहरीका अनुसार शुक्रबार दिउँसो करिब ४ः५५ बजे इलाका प्रहरी कार्यालय गोलबजारबाट खटिएको टोलीले शंकास्पद अवस्थामा रहेका नरहा गाउँपालिका–३ खोरीया टोलका २४ वर्षीय महमद साहिल आलमलाई चेकजाँच गरेको थियो। सो क्रममा उनको साथबाट प्लास्टिकसहित १ ग्राम ९० मिलिग्राम र प्लास्टिकबाहेक १ ग्राम ३८ मिलिग्राम तौल भएको ब्राउन सुगरजस्तो देखिने पदार्थ तथा एक थान मोबाइल बरामद भएको प्रहरीले जनाएको छ। बरामद पदार्थ र मोबाइलसहित आलमलाई नियन्त्रणमा लिएर इलाका प्रहरी कार्यालय गोलबजारमा राखी घटनाबारे थप अनुसन्धान भइरहेको जिल्ला प्रहरी कार्यालय सिरहाले जनाएको छ।