नरहा गाउँपालिकाको २०७४।७५ र २०७५।७६ को आय व्यय सार्वजनिक

सिरहा । सिरहाको नरहा गाउँपालिकाको २०७४।७५ र २०७५।७६ को आय व्यय सार्वजनिक गरिएको छ ।

गाउँपालिकाले सोमबार पत्रकार सम्मेलन गरी आर्थिक वर्ष २०७४।७५ र २०७५।७६ को हालसम्मको आय व्यय सार्वजनिक गरेको हो । गाउँपालिकाका एक वडाध्यक्षसहित कार्यपालिका सदस्य तथा विपक्षी दलहरुले विभिन्न आरोपसहित पारदर्शीताको माग गर्दै झण्डै दुई महिनादेखि आन्दोलन गर्दै आइरहेका छन्् ।

विभिन्न योजनामा कामै नगरी रकम निकालिएको तथा मनोमानी तरिकाले व्यापक भ्रष्टाचार भएको आरोप उनीहरुको छ । गाउँपालिकाको आम्दानी र खर्चको पूर्ण विवरण माग गर्दै आन्दोलन भइरहँदा गाउँपालिकाले भने पत्रकार सम्मेलन नै गरेर आय व्यय सार्वजनिक गरेको हो ।

गाउँपालिकाले सार्वजनिक गरेको आय व्यय अनुसार, आर्थिक वर्ष ७४।७५ मा कुल बजेट २१ करोड ९६ लाख १ हजार ८ सय ४३ रहेकोमा १७ करोड ३६ लाख ३१ हजार ९ सय ७८ खर्च भएको छ भने आर्थिक वर्ष ७५।७६ मा १९ करोड ६४ लाख ९९ हजार ३ सय ८४ बजेट रहेकोमा १५ करोड ७० लाख ७८ हजार ६ सय रकम खर्च भएको आय व्यय विवरणमा उल्लेख छ । आन्दोलन तथा विरोधले पालिकाको काम कारवाहीमा समस्या भएको भन्दै यसको समाधान होस् तथा गाउँपालिकाको आय व्यय विवरण सबै समक्ष पुगोस् भनेर सार्वजनिक गरेको गाउँपालिका अध्यक्ष रामशरण यादवले बताए ।

अध्यक्ष यादवले यसअघि उनीहरुलाई योजना दिँदा अपारदर्शी काम गरेको र त्यसपछि नदिँदा व्यक्तिगत स्वार्थको लागि आन्दोलन गरिरहेको गुनासो गरे । पहिला योजना चलाउन दिँदा केही नबोल्ने तर, अनियमितता नहोस् भनेर अब नदिँदा भइरहेको आन्दोलन विरोधीको बखेडा बाहेक अरु केही नभएको दावी उनले गरे ।

यस गाउँ कार्यपालिकामा १३ सदस्य छन् । तीमध्ये वडाध्यक्षसहित पाँचजना सदस्य आन्दोलनमा उत्रिएका छन् । गाउँपालिकाले आय व्यय सार्वजनिक गरेपनि उनीहरुले आन्दोलन भने यथावत् राखेका छन् ।