मारुति सिमेन्ट उद्योगको गोरखधन्दाविरुद्ध संघर्ष समिति गठन

सिरहा  मारुति सिमेन्ट उद्योगको गोरखधन्दाविरुद्ध संघर्ष समिति गठन भएको छ । मारुति सिमेन्ट उद्योगले हड्पेको सार्वजनिक जग्गा जोगाउन तथा त्यस क्षेत्रमा पर्यावरणमा पुर्याइरहेको गम्भीर क्षति रोक्न संघर्ष समिति गठन भएको हो । तत्कालिन राजपा निकट राष्ट्रिय विद्यार्थी संघका केन्द्रीय अध्यक्ष चिरञ्जीवी यादवको संयोजकत्वमा गठित संघर्ष समितिमा २० जना सदस्य तथा १० जना सल्लाहकार गरी ३१ जना रहेका छन् । संघर्ष समितिले मारुति सिमेन्टले गरिरहेकोे मनोमानी र गोरखधन्दाविरुद्ध भोलि (सोमबार) देखि नै आन्दोलनको सुरुवात गर्ने भएको छ । समितिको आज बसेको बैठकले यसअघि फिर्ता गराएको पूर्वपश्चिम राजमार्गमा रहेको मारुति सिमेन्ट उद्योग छेउको जग्गामा भोलि विहान ९ बजे भेला हुने र त्यसपछि मारुति सिमेन्टको गेटमा गएर प्लेकार्डसहित प्रदर्शन गर्ने निर्णय गरेको छ । यो आन्दोलन सबैका लागि भएकाले स्थानीयहरुलाई सहभागी भएर आन्दोलनमा एक्यवद्धता जनाइदिन संघर्ष समितिले आग्रह पनि गरेको छ । मारुति सिमेन्ट उद्योगले गोलबजार नगरपालिका र नरहा गाउँपालिकामा पर्ने झण्डै साढे तीन–चार बिघा वनको सार्वजनिक जग्गा आफूखुसी मनोमानी ढंगले अतिक्रमण गरेको छ । जग्गा अतिक्रमण मात्रै होइन, सिमेन्ट उद्योगबाट निस्कने प्रदुषित धुवाँले आसपासका बस्ती पनि जोखिममा छन् । मारुति सिमेन्ट उद्योग परिसरमै रहेको शारदा डिष्टिलरीले घुर्मी खोलाबाट बगाउँदै आएको विषादियुक्त पानीले पनि यहाँका सर्वसाधारणको स्वास्थ्यमा विभिन्न किसिमको समस्या देखिनुका साथै अन्नबालीमा पनि गम्भीर क्षति हुँदै आएको छ । मारुति सिमेन्ट र शारदा डिष्टिलरीको मनोमानीका कारण गोलबजार नगरपालिका, मिर्चैया नगरपालिका र नरहा गाउँपालिकासहित घुर्मी नदीको छेउमा रहेका दर्जनौं गाउँका लाखौं जनता प्रत्यक्ष रुपमा प्रभावित छन् । यहाँका स्थानीयहरुले जग्गा अतिक्रमण तथा प्रदुषण रोक्न निरन्तर रुपमा आवाज उठाउँदै आएका छन् । तर, यी कारखानाले भने केहि नेता तथा यहाँका जनप्रतिनिधिकै मिलेमतोमा अर्थात् शक्तिको आडमा मनमौजी गर्दै आएका छन् । समितिका संयोजक यादवले गैरकानूनी काम गर्नेहरुलाई सुध्रिन चेतावनी दिएका छन् । अब उही समय नरहेको भन्दै गैरकानूनी काम गर्नेहरु नसुध्रे त्यसको परिणाम भोग्नुपर्ने उनको चेतावनी छ ।