सिरहाको औरहिमा १५ शैया अस्पतालको शिलान्यास

प्रदेश टाइम्स बिष्णुपुर, सिरहा। २५ मंसिर – प्रदेश २ स्थित सिरहाको औरही गाउँपालिकामा पन्ध्र शैयाको अस्पताल शिलान्यास भएको छ । संघीय सरकारको ‘एक पालिका एक अस्पताल’ कार्यक्रम अन्तर्गत ग्रामीण समुदायको स्वास्थ्य सेवामा सहज पहुँचको लागि अस्पतालको शिलान्यास भएको छ । अस्पताल शिलान्यास गर्दै कार्यक्रमका प्रमुख अतिथि सिरहा क्षेत्र नं-२ का प्रतिनिधि सभा सदस्य सुरेश चन्द्र दास यादवले शुभकामना मन्तव्य राख्दै भने- “जब सम्म स्वास्थ्य सेवामा सबै नेपालीको सहज पहुँच हुँदैन तब सम्म हाम्रो देश वासी छिमेकी मुलुक भारतको अस्पतालहरुमा ध्याय रहन्छ । सिरहाका उत्तरी भेग लोकमार्गका नजिकका वासीहरुको यातायात सेवाको सहज पहुँच भएकाहरु उपचारका लागि तुरुन्त धरान विराटनगर गइहाल्छ । बढी जनघनत्व भएको दक्षिणी भेगको यो अस्पताल समयमा संचालन गर्न औरही गाउँपालिकालाई अनुरोध होईन यस क्षेत्रको प्रतिनिधि सभाको हैसियतले निर्देशन दिइरहेको छु । साथै यस अस्पतालमा प्रसुती सेवा शल्य चिकित्सक विशेषज्ञको पनि सुविधा होस् ताकी यस भेगका दिदीबहिनीको अकालमा मृत्यु नहोस् ।” हरेक नेपालीको स्वास्थ्य कार्ड होस् । त्यो कार्ड लिएर नेपालको कुनै पनि अस्पतालमा उपचार नि:शुल्क होस् यसको लागि सदनमा पनि कुरा उठाउदै आएको प्रतिनिधि सभा सदस्य यादवले वताए । ‌अस्पताल शिलान्यास कार्यक्रमको अध्यक्षता गरेका औरही गाउँपालिका अध्यक्ष सिद्धार्थ यादवले भने -“औरही गाउँपालिकाले यस अस्पतालको भवन दुई वर्ष भित्रमा नै सम्पन्न गरि अस्पताल संचालन पनि समय अगावै योजना छ । सर्पदंश उपचार केन्द्र टाढा भएकोले वर्षेनि हाम्रो पालिकामा सर्पदंशको कारणले कुनै न कुनै पालिका वासीको अकालमा ज्यान गुमाउनु पर्छ । ‌ हामीले अस्पतालमा सर्पदंश उपचार केन्द्र पनि संचालन गर्ने योजना छ । प्रत्येक वडामा माध्यमिक विद्यालय स्थापना गर्ने लक्ष्य रहेको छ । मावि औरही लाई प्राविधिक धारको स्थापना र स्नातक कार्यक्रम संचालन गर्ने अध्यक्ष यादवले जिकिर गरे । गाउँपालिकाका प्रमुख प्रशाकीय अधिकृत कमलदेव यादवले भने-औरही गाउँपालिकामा १५ शैयाको अस्पतालको शिलान्याश हुंदा एक दम खुसी भएको छु । यो एक वर्षिय योजना होईन वहुवर्षिय योजना हो । त्यसैले यो अस्पताल समयमा नै संचालन हुनेछ । यस अस्पतालका परिपुरक र समपुरक यस पालिकाका जनप्रतिनिधि हुन । कार्यालयको तर्फबाट यो अस्पताल संचालनको लागि म प्रमुख प्रशाकीय अधिकृतको हैसियतले कुनै कसर बाकी नराख्ने अधिकृत यादवले जानकारी गराए । मन्तव्यकै क्रममा गाउँपालिकाका स्वास्थ्य संयोजक उपेन्द्र यादवले विगतका दिन सम्झदै भने -वि.स २०४८ सालमा उप-स्वास्थ्य चौकीको रूपमा स्थापना हुँदै २०५३ सालमा स्वास्थ्य चौकीको स्तरोन्नती गरि प्राथमिक स्वास्थ्य केन्द्र हुंदै अस्पताल बन्नुमा औरहीको राजनीतिज्ञ पहुँच पहेलि देखि नै सत्तासङ्ग रँहदै आएको छ । फलस्वरूप हामीले १५ शैयाको अस्पताल पाएको स्वास्थ्य संयोजक यादवले जनाए । समाजसेवी तथा पूर्व शिक्षक श्याम नन्दन यादवले गाउँपालिका माथी प्रश्न गर्दै भने- प्रदेश सरकारले उपलब्ध गराएको बजेट किन उपयोग भइरहेको छैन ? प्रदेश सरकारको डेढ करोड बजेट गाउँपलिकाले किन खर्च गर्न सकेन । फ्रीज किन भयो ? हामी गाउँपालिकाको विकासको काममा सहकार्य गर्न तयार छौं । प्रदेश सरकारले फेरि पनि मावि औरहीलाइ ५० लाख उपलब्ध गराएको छ । आफुलाइ अझै पनि यो बजेट फ्रिज हुने हो कि भन्ने चिन्ता लागेको समाजसेवी यादवले दुखेसो पोखे । ‌ वडा नं-४ का वडा अध्यक्ष उपेन्द्र प्रसाद यादवले भने-गाउँपालिकाको आफ्नै भवन कहिले बन्छ ठेगान छैन हाम्रो प्रशाकीय कार्यालय अहिले पनि भाडाकै भवनमा छ । हामीसंग जगाको कमी छैन, बजेटको पनि कमी छैन । गा.पा अध्यक्षको इच्छा शक्तिको कमी रहेको गुनासो वडा अध्यक्ष यादवले व्यक्त गरे ।