सिरहा अस्पतालमा पिसिआर प्रयोगशाला उद्घाटन

प्रदेश टाइम्स बिष्णुपुर, सिरहा, मंसिर  । जिल्ला अस्पताल सिरहामा कोरोना परीक्षण गर्न पिसिआर प्रयोगशालाको उद्घाटन गरिएको छ । पिसिआर मेसिनको जडान गरिएको प्रयोगशालाको उद्घाटन प्रदेश २ का सामाजिक विकास मन्त्री नवल किशोर साहले गरेका छन् । कोरोना भाईरसको परीक्षण गर्न उदेश्यले सिरहा अस्पतालमा सामाजिक विकास मन्त्रालयले एक सेट पिसिआर मेसिन पठाएपछि प्रयोगशाला स्थापना गरिएको छ । एक लोटमा ९० जनाको स्वाव संकलन गरी पिसिआर परीक्षण गर्न सकिने क्षमताको अमेरिकन बायोर्याड कम्पनीको अत्याधुनिक मेसिन भएको पिसिआर प्रयोगशाला सिरहाका ईन्चार्ज (ल्याब टेक्नोलोजिस्ट) संजय साहले बताए । उक्त मेसिन जडान गरी प्रयोगशालाको उद्घाटन गरिएपनि जनशक्ति आपूर्ति हुन दुई÷तीन दिन लाग्ने भएको छ । पिसिआर प्रयोगशाला संचालन गर्न विभिन्न तहका १३ जना जनशक्ति आवश्यक भएकोले अहिले उद्घाटन मात्र गरिएको सामाजिक विकास मन्त्री नवल किशोर साहले बताए । पिसिआर प्रयोगशालाको लागि आवश्यक जनशक्तिको व्यवस्थापनमा प्रदेश सरकार जुटेकोले केही दिनभित्रै दक्ष जनशक्ति परिचालन गरि प्रयोगशालाबाट परीक्षण कार्य सुरु हुने मन्त्री साहले बताए । पिसिआर मेसिन जडान गरिएको प्रयोगशाला उद्घाटन गर्न सामाजिक विकास मन्त्री साह, सामाजिक विकास मन्त्रालयका सचिव, प्रदेश २ का स्वास्थ्य डाईरेक्टर लगायतका टोली सहभागि थिए । पिसिआर प्रयोगशाला उद्घाटन गर्न सहभागी मन्त्री साह सहितका टोलीलाई सिरहा नगरपालिकाका मेयर अशेश्वर प्रसाद यादवले दोसल्ला र गम्छा ओढाएर सम्मान गरेका थिए । १३ जनाको जनशक्ति आवश्यक पिसिआर प्रयोगशालामा स्वाव संकलन, जाँच्ने र रिर्पोट तयार गर्नेगरी १३ जना जनशक्ति आवश्यकता रहेको छ । ल्याब टेक्नोलोजिस्ट ६ जना, ल्याब टेक्निसियन २ जना, ल्याब असिस्टेन्ट २ जना, एक÷एक जना कम्पुटर अपरेटर, कार्यालय सहयोगी र सुईपरको आवश्यकता रहेको ल्याब टेक्नोलोजिस्ट साहले बताए । जिल्ला अस्पताल सिरहा प्रदेश सरकारको मातहतमा भएकोले प्रयोगशालाको संचालन र व्यवस्थापनको जिम्मा समाजिक विकास मन्त्रालय गरिने भएको छ ।